Nimm di maal Tied (plattdeutsch)

Ick will di afsolut nix opsnacken oder vörbeern, aver överlegg maal, wo dien Tied di wegloopen deit. Du geihst na School, warst entlaaten un fangst an to leern oder to studeern. Un denn? Denn maloochst du! Fangst Dag för Dag bitieden an, kummst laat no Huus. Un wenn du Pech hest, most du noch stünnenlang na de Arbeit hen- un wedder trüchföörn. Un Tohuus givt dat faken jo ok noch wat to daun. Du hest woll Weekenend, aver markst du dat? Wenn dat Weer dat tolett, prünscherst du in'n Goorn rüm oder söchst di anners wat un hest keene Tied för di sülm?

Mi geiht dat ok nich veel anners. Blooß an'n Sündag dor maak ick nix. Dat, wat ick in de Week nich schafft heff, löppt mi an'n Sündag ok nich weg.
Ick kann di nur raden: Nimm di de Tied, maak doch wat mit de Familie – wo gau sünd de Gören groot – oder sett di op't Rad un fööhr maal dör de Wischen. Du glöövst gor nich, över wat du di denn freun kannst.

So wöör dat för mi dütt Johr wedder richtig schöön, as ick de eersten Lerken to seen kreeg, as se opsteegen nahn Häven to un dorbi so wunnerbor tirilierten – un as de Kiwitt's eer Kunstflöög maken deen. Du weest denn: Dat Frööjohr kummt wedder, de Welt is schöön: „Gott Vadder, dat hest du good maakt.“ Oder sett di maal an'n Balksee. Keen Larm is dor, reine Stille! Dat eenzige wat du villicht höörn kannst, is'n Aant, de dor rümquaakt. Du kummst to Rooh un weest noch eenmaal: „Gott Vadder, dat hest du good maakt.“

Ick weet nich, ob du in'n Sommer in Urlaub fööhrst. Wenn du dat deist, nimm di ok maal Tied för di. Gaa mal an Aabend, wenn nümms meehr dor is, an' Strand un sett di dor still hen. Du höörst dat liese Plätschern von Waater, süst de Steerns („Weißt du, wieviel Sternlein stehen?“) un markst: de Stille deit di good. De Welt is schöön: „Gott Vadder, dat hest du good maakt.“

Dat givt noch een Stee, wo du to Rooh kamen kannst: Nimmt di maal de Tied un sett di liese in een Kark – nich in so een, wo de Touristen so dörloopt, ne, een, wo du ganz alleen binnen sitten deist – un dann kannst du düütlich marken: De Stille deit mi good. De Welt is schöön un ick weet: „Gott Vadder passt op mi op.“


Gerd Lafrenz